Aux amis de Disip

Mo bann frer ek ser bieneme, nou bizin kontan nou kamarad, parski lamour sorti kot Bondie. Dimoun ki kontan so kamarad, li sorti kot Bondie e li konn Bondie. ⁸ Bondie limem lamour, dimoun ki pa kontan so kamarad, li pa konn Bondie. ⁹ Ala kouma Bondie finn montre so lamour pou nou: Li finn avoy so sel garson dan lemonn pouki nou gagn vre lavi par li. ¹⁰ Ala ki vedir lamour: pa nou ki finn kontan Bondie me Bondie ki finn kontan nou e li finn avoy so garson sakrifie limem pou nou pese. ¹¹ Mo bann frer ek ser bieneme, si Bondie finn kontan nou sa kantite la, nou osi nou bizin kontan nou kamarad. ¹² Personn pa finn zame trouv Bondie; si nou kontan nou kamarad, Bondie viv dan nou e so lamour pou vinn parfe dan nou leker. ¹³ Ala kouma nou kone ki nou ini ar Bondie e ki li dan nou: parski li finn donn nou so Lespri. ¹⁴ Nou finn trouve e nou temwagne ki Bondie finn avoy so Garson kouma Sover lemonn. ¹⁵ Si kikenn konfese ki Zezi limem Garson Bondie, Bondie res ini avek li e li res ini ar Bondie. ¹⁶ Nou kone e nou krwar ki Bondie kontan nou. Bondie limem lamour. Tou dimoun ki viv dan lamour, li res ini ar Bondie e Bondie viv dan li. ¹⁷ Lamour li parfe dan nou. Alor, zour zizman, nou pou ena boukou kouraz parski dan sa lemonn la nou parey kouma li. ¹⁸ Pena okenn lafreyer dan lamour; vre lamour repous tou freyer. Lafreyer li liye ar pinision, e tou dimoun ki gagn per, li pa ankor viv vre lamour. ¹⁹ Nou, nou kontan nou kamarad parski Bondie finn kontan nou anpremie. ²⁰ Si kikenn dir, “Mo kontan Bondie”, apre li air so frer ek ser, li enn manter. Si li pa kontan so frer oubien so ser ki li trouve ar so lizie, li pa kapav kontan Bondie ki li pa trouve. ²¹ Ala komannman ki li finn donn nou: seki kontan Bondie bizin kontan so frer ek so ser osi. 1 Zan 4:7-21